ဖဲလါစဲးပထ့ဘၢၣ်ထီၣ် (၂)သီ, ၂ဝ၂၃နံၣ်အနံၤ ဆူၣ်ချ့မၤစၢၤဝဲၤကျိၤဒီး UK တၢ်ကရၢကရိတဖုလၢအမ့ၢ် Hope for the World (H4W) ရဲၣ်ကျဲၤမၤဝဲကသံၣ်သရၣ် Medic တၢ်သိၣ်လိပျၢ်အမူး ဖဲကီၢ်ဆၢတၢ်လီၢ်တတီၤန့ၣ်လီၤ. တၢ်သိၣ်လိအံၤမ့ၢ်ဝဲ Medic တၢ်သိၣ်လိ (၁ဝ)ဝီတဝီ လၢဆူၣ်ချ့ မၤစၢၤဝဲၤကျိၤ ဒီး H4W ရဲၣ်ကျဲၤမၤဝဲန့ၣ်လီၤ. တၢ်သိၣ်လိအတၢ်ပညိၣ်မ့ၢ်ဝဲဒ်သိး တၢ်ကမၤအါထီၣ်ဝဲဆူၣ်ချ့ပှၤမၤတၢ်ဖိလၢ ဂံၢ်ခီၣ်ထံးတၢ်ကူးစါ ယါဘျါ ဒီး ကတီၢ်ထီတၢ်ကူးစါယါဘျါအဂီၢ်န့ၣ်လီၤ. တၢ်မၤလိအံၤအဆၢကတီၢ်ယံာ်ဝဲ (၁၁)လါ ပာ်ဃုာ် တၢ်မၤလိလံာ် (Theory) ဒီး စုသ့တၢ်မၤ လိ (Practical) န့ၣ်လီၤ. ပှၤလၢ်ဖျိ ထီၣ်တၢ်မၤလိခဲလၢာ်အိၣ်ဝဲ (၂၄)ဂၤ ဒီးပှၤဖျိထီၣ်တၢ်မၤလိတဖၣ်အါဒၣ်တၢ်တက့ၢ်မ့ၢ်ဝဲ ကီၢ်ရ့ၣ်ဘျံးဒဝဲၢ် ဆူၣ်ချ့ မၤစၢၤဝဲၤကျိၤ, ကီၢ်ရ့ၣ်ဒူပျာ်ယာ် ဆူၣ်ချ့မၤစၢၤဝဲၤကျိၤ ဒီး သုးက့ (၄) သုးကသံၣ်ဝဲၤဒ့အပှၤသ့ၣ်တဖၣ်န့ၣ်လီၤ.
တၢ်သိၣ်လိသရၣ်သ့ၣ်တဖၣ်အါဒၣ်တၢ်တက့ၢ်မ့ၢ်ဝဲ Hope for the World (H4W) အပှၤသ့ၣ်တဖၣ်န့ၣ်လီၤ. တၢ်မၤလိအံၤဘၣ်တၢ်နီၤဖးလီၤအီၤ အကူာ် (၃)ကူာ်ဒ်အမ့ၢ် အကူာ် (၁) Basic Science, အကူာ် (၂) Diseases and Procedures ဒီး အကူၣ် (၃) Public Health and Health Management သ့ၣ်တဖၣ်န့ၣ်လီၤ.
တၢ်မၤလိပျၢ်အမူးဆၢကတီၢ် တၢ်ဟ့ၣ်လၤကပီၤစ့ၢ်ကီးဝဲ ဆူၣ်ချ့ပှၤမၤတၢ်ဖိလၢဖျိထီၣ်တ့ၢ် Medic တၢ်သိၣ်လိဒီးဆဲးမၤတၢ်တပယူာ်ဃီသ့ၣ်တဖၣ် န့ၣ်လီၤ. ပဝဲဆူၣ်ချ့မၤစၢၤဝဲၤကျိၤ ပသးအိၣ်စံးဘျုးစံးဖှိၣ်ဘၣ်က့ၤ Hope for the World, Mae Tao Clinic ဒီး ဆူၣ်ချ့မၤစၢၤဝဲကျိၤ တၢ်သိၣ်လိက ရူၢ်လၢအတၢ်ပာ်ဖှိၣ်မၤသကိးတၢ်လၢ တၢ်ဃုကျိၣ်ဃုစ့မ့ၢ်ဂ့ၤ ဒီး တၢ်သိၣ်လိအတၢ်ကဲထီၣ်လိၣ်အဂီၢ်မ့ၢ်ဂ့ၤ ဒီး တၢ်သိၣ်လိမၤဒိးမ့ၢ်ဂ့ၤန့ၣ်လီၤ.